今日第一件事要做的嘢係換車票，事關下午我要去指宿，一早已在jr 網上book 咗觀光列車玉手箱的座位，大家記得要print 張receipt 連號碼出黎，再去green window 拎網上買嗰張credit card 去拎飛就ok, 記得一定要帶credit card 呀！

換完飛後就搭車去今朝安排的唯一的一個景點，仙巖園。 仙巖園是鹿兒島很出名的的點點，地方建於1658年，是薩摩藩藩主島津家的別墅和庭園， 在這裡可以觀賞整個鹿兒島灣與櫻島火山。 這是我第一個見到最多講國語旅客的鹿兒島地方，哩兩日見到的旅客都係香港人。 睇吓d 國語遊客，大部份都係貼有xx 遊輪，或yy 遊輪的label, 而且見佢哋都幾趕吓，應該係遊輪假期下只放落黎行幾個鐘嗰d 遊客。 

篤姬多處取景的地方~

仙巖園除了有和式風格後，還有中式的風格，有些佈局是彷秦朝阿房宮的style, 環境幽美，好適合影相。 入面仲有一個地方賣貓神御守等等貓貓的東西，我覺得幾得意，都忍唔住買咗d 手信。

行咗個幾鐘，見到攰攰地而且都係十二點左右，就決定係園內食埋lunch 先返中央車站。 仙巖園有幾間餐廳，比較多人去的應該係松風軒同我去咗的櫻華亭。 櫻華亭的window seat 可以睇哂全個櫻島，所以一邊食飯一邊睇絕景真係好爽！ 我叫咗櫻華亭的雞飯食，其實可以叫雞湯泡飯，我覺得幾有特式，仲買咗盒返香港再食！

之後搭巴士返中央車站，見到有fun fair, 仲有自衛隊黎做promote, 我就去玩吓試吓著佢d 衫。 見到仲有d 時間，就行咗一陣商場買咗少少嘢再去拎行李開始下午的指宿之行！

我是坐下午2 點的玉手箱。玉手箱有黑白兩色的外形，最出名的地方是有著住窗口的側座同後面有小書枱的兩人座。因為我早一個星期已在網上book, 所以一早㨂咗心儀的窗口側座。而且入面仲有一些小紀念的地方，就係可以有紀念照拍，同有一些特式的小食賣！ 食咗佢非常出名的芝麻pudding, 好香好濃，的確美味！ 車程大約50 分鐘，但睇吓景同埋四圍影下相，飛咁快就到達指宿了！ 

去到指宿，當然首先要去溫泉旅店check in. 我今次book 咗朋友推薦的吟松， 唯一唔好係冇接送。 吟松之前用email 聯絡推薦搭的士，因為其實只係五分鐘車程。 不過我見時間尚有，而且指宿我只打算去玩砂浴，就決定搭巴士。 吟松其實在砂會館隔離，所以所以去會館的巴士就可以搭，巴士站在jr 駅對面，不過巴士唔太密，要等一等車！ 記得係第三個站落，其實都方便，不過留意行李太大就未上到車！

去到砂會館落車後，吟松只係行前一分鐘左右的隔離，非常方便。 Check in 吟松時安排有welcome drink, 感覺幾貼心， 房間亦很大，仲有一間房有張雙人床俾訓唔慣地下的人訓。 不過最驚艷當然是有一個對正海景的大窗，景色怡人！係房間休息咗一陣，就著住吟松的浴衣直接去玩砂浴la!

砂浴分唔同票價，分別只在要唔要佢d 毛巾。買好飛後，就可以拎住毛巾同浴衣去換衫。會館會俾一件藍色的浴衣你換，除哂衫著好哩件浴衣後，就可以跟住指示牌去戶外進行砂浴的地方，dc 同手機都可以拎，去到俾工作人員佢哋會幫你影！砂浴其實以前在別府玩過一次，所以今次就冇上次咁新鮮，而同感覺上次staff 影相pro d, 因為佢哋會多角度主動幫你影，哈哈！ 不過指宿的砂宿都係好好的體驗，冇想像中咁爆汗，不過都係熱的。 砂浴的時間大約十分鐘至三十分鐘，隨你自己，覺得足夠自己起身就ok, 之後就順路返會館浸溫泉。

指宿的溫泉係古時薩摩藩藩主都會黎舒緩疲勞的地方，所以好出名。但我相信我旅店的露天溫泉應該會比會館哩個更正，所以浸咗一陣就返旅店浸露天溫泉。 雖然露天的溫泉唔算好大，大約可浸6個人左右, 但風景一流，望住個無敵大海景黎浸溫泉，感覺特別舒服！(不過我之前都有浸過一D 風景咁靚的溫泉, 例如支芴湖同田沢湖等等)

浸完溫泉休息一陣後, 就落去二樓食DINNER. 諗唔到好有驚喜! 平時溫泉旅店一係在房裡用餐, 一係在下面的大食堂用餐, 諗唔到吟松原來將二樓間成一間間的小個室, 每個都有自己的私人空間, 感覺非常貼心! 在餐桌前有一排熱砂, 會有即煮的溫泉旦. 而且仲有STAFF 即刻幫你炸鹿兒島的魚餅. 我自己就最欣賞佢個”真正”的溫泉旦, 係你面前即刻用溫泉水整, 正! 而個鍋都好食, 黑毛豬同海鮮都好鮮味, 不過如果下次黎我會UPGRADE 佢個餐, 因為好似冇食過黑毛和牛好似總係爭咗少少嘢咁~~ ^^

食飽飽後就去行咗一陣小賣部, 再返房休息寫POSTCARD~ 今次係櫻島買哩款POSTCARD 幾得意, 不過記得唔好太重手, 唔係會全張卡黑哂~ 哈哈! 大家有興趣可以係櫻島VISITOR CENTRE 買!

臨訓前再去浸多次溫泉, 不過黑麻麻, 就冇去八樓浸, 去咗二樓的大浴場~ 大浴場出面都有一個露天的溫泉, 當然睇唔到海, 不過邊住美麗的月亮同星星一齊浸, 都一樣舒暢~

話咁快聽日就要返香港了, 時間過得真快~~