7點一到, 屋主的女兒已經提我哋早餐已經預備好, 可以出去食LA~

每次一泊兩食的食事也很豐富, 今次都唔例外, 和式得黎仲有少少洋式的食物, 真係細心~

今日有一道很特別的菜, 味噌朴葉燒, 是用手掌大的朴樹葉子墊底，上面放上特製的味噌醬，金針姑，蔥等，
再放到鐵板鍋上加熱, 送飯非常野味~~ ^^

食飽飽後, 大家諗住快D出發去參觀景點, 諗唔到老板娘叫咗我哋~

原來佢打算借YUKATA俾我哋影相~

難得有機會, 當然唔好錯過LA~

老板娘仲好NICE 咁幫我哋著埋(因為雖然只係普通的浴衣, 其實都幾難著~~), 之後仲借埋傘埋我哋做裝飾

我哋3個女仔著咗YUKATA 後就係門口係咁影相, 真係影到不亦樂乎~~呵呵~

影咗半個鐘左右, 終於記得我哋係要觀光地方要去GA LA~

第一站就係屋主女兒極力推薦的展望台

大田屋離展望台很近, 不過行上山都幾辛苦~ 雖然辛苦, 不過都幾值得, 因為風景都真係幾靚吓~

'

綠油油的田地加上童話一般的木屋, 有一種幸福的感覺~ ^^

之後就去和田屋參觀, 和田屋是最古老的合掌屋, 有400年的建造歷史，主人是大戶人家，是村中數一數二的富商, 所以屋子非常有氣派!

從一樓到五樓格局完整，陳設當地人民生活用品，耕作農具等等，被列為「國家指定重要文化財」

本黎仲想去參觀和田家二兒子分家的神田家及明善寺等等, 但因為早上影相花了太多時間, 最後大家決定在街上逛逛拍拍照加看看手信便算了~

我仲買咗個飛彈寶寶掛飾, 聽講不同色有不同的意思, 不過佢真係好得意~~

下次如果冬天有機會再來多一次吧~

10時45分要趕搭去高山的巴士, 屋主很友善俾咗杯橙汁我哋飲, 仲車了我們去車站, 大家如果下次去白川鄉, 我都好推介大家住大田屋~~~ ^^

高山是一座歷史悠久的城市，在市內的老街區，其色彩濃厚的古代城堡城市（日語稱“城下町”）的影子依稀尚存! 另外，春秋兩季舉辦的高山祭（高山市的傳統節日），因與京都的祇園祭、埼玉縣的秩父夜祭並稱 “日本三大美祭”而遠近聞名~

到達高山後, 因為我哋今日BOOK 咗3點半的酒店FREE SHUTTLE 直達奧飛彈溫泉鄉, 所以就去搵咗在高山的姐妹店擺放行李先~

之後, 第一時間當然去醫肚先LA~ 睇介紹高山的中華SOBA 也很出名, 便找了一間叫桔梗屋的食中華SOBA~

幾好食, 個湯清清哋, D麵就好彈牙~~ 正!

其實個SOBA都幾細碗吓, 不過大家諗住黎得高山, 當然要去掃吓街食飛彈牛LA, 飽得7成岩岩好~~

我哋一邊去朝市及古街的方向行, 發現真係每個店鋪也有賣飛彈牛串燒及其他飛彈牛的食品

吃吃渴渴, 就行到去高山的古街了~

古街把江戶時代的住宅保存完好, 依然看到城堡城市“高山”的影子

見到日本的文化遺產保護得咁好, 而且又乾淨, 如果中國或者香港有多D哩D地方應該可以吸引更多遊客~

古街沿著行, 就到高山另一出名的景點, 高山陣屋

高山陣屋，原為高山城主金森氏的宅邸之一。金森氏左遷後，高山成為德川幕府的直轄地區，代官（地方官）、郡代（官名）等在此設置了辦公機構，以管理飛驒地 區的行政。這個辦公場所（日語稱“役所”），被稱為“高山陣屋”，官員們在此下達命令、通知以及辦理納貢事宜等 ~

陣屋因為我估係以前地方官辦工的地方, 所以面積都幾大, 而且還把當時貨倉改建了擺放著當時的最要文物供人參觀

不過入面發生咗一個幾搞笑的事~

日本很多地方因為是最要文化遺產的關係, 所以好多都要除鞋入內, 而門口多數會有俾膠袋你拎著自己對鞋~

我哋3個一開始就圍著陣屋外圍行, 跟住見到入面可以入去WOR, 又見到有一個好似入口的地方, 就除咗鞋入去LA~

入咗去, 見到有遊客拎著個裝咗鞋的膠袋, 大家就諗唔通我哋入錯入口, 咁望吓個牌, 寫著"役人出入", 心諗哩度可能係FOR STAFF 出入GA,

咁都冇人, 照樣入都OK LA~~~~

參觀完後, 我哋3個當然好ON居咁要行返去原來的門口拎鞋, 之後突然靈光一閃!!

根本哩度唔係FOR STAFF 進入, 哩度係陣屋嘛, 係俾以前政府工作人員(役人)進出辦工的地方

我哋入去的入口其實唔係入口黎GA, 係景點黎, 介紹俾人知以前哩度係俾"役人"進出GA 咋~~

哈哈~~~

睇吓時間, 已經差唔多3點, 大家就開始行返去搭SHUTTLE BUS 去今晚的溫泉酒店

我哋今晚會住奧飛彈溫泉鄉入面新穗高的山之HOTEL, 其中一個優點係有FREE SHUTTLE, 可以慳返一程車錢

奧飛驒溫泉鄉四周環抱著北阿爾卑斯山脈3,000公尺級群山，溫泉流量豐沛，露天溫泉數目居日本之首，遠近馳名

我哋今次揀咗五個溫泉地區最入面的新穗高溫泉, 想去睇一睇深山入面的溫泉有幾深山!

大約2個小時的車程, 終於到達俾山脈包圍的新穗高, 今晚的溫泉酒店亦好靚~

大家上黎到酒店, 當然想去試吓溫泉先LA, 但卻有一件事煩擾著我們

便是明天本黎打算去上高地, 但因為下大雨LANDFALL 的關係, 聽日冇車去到上高地

唔去上高地都冇問題, 最大問題係明天經上高地再去松本的巴士都CLOSE 咗~ >,<

上高地可以改最後一日去, 但松本聽日卻一定要去, 第一BOOK 咗酒店, 第二就係後天的立山黑部一定要由松本出發~~

最後, 諗住成個鐘, 解決辦法只有TAXI了~~~ 雖然比巴士貴一陪以上, 但已經係唯一的辦法~

黎到日本, 就係好掛住香港咁抵搭的TAXI~~~

聽日唯有搭我哩生人最貴的一程的士LA~~~~

諗好後, 大家就去溫泉出發~~

山之HOTEL 有一個好特別就設計, 因為溫泉在深山的關係, 露天溫泉在酒店的外面

諗唔到個5分鐘路程竟然會有纜車伐步, 仲有一個叫幸福之站

為什麼呢? 因為酒店主人太愛自己的妻子, 而妻子很愛浸溫泉, 但有一次下山浸溫泉時因為山路的關係整傷咗腳

老公就為咗太太可以第時安全D去浸溫泉, 就整咗哩部纜車~  係咪好SWEET 好浪漫呢~~~ ^^

露天溫泉的風景非常靚, 而且仲有一個係混浴一個係女子的溫泉~ 不過我哋落去時混浴嗰邊一個人都冇~~~

呵呵~~~~

我哋當然冇係混浴嗰邊浸, 唔知會唔會冇啦啦有個男人走入黎GA MA~

不過今次的溫泉風景就係好靚, 繼上次北海道的支芴湖的無敵湖景溫泉後, 哩個又係一個靚靚溫泉地方~

夜晚的料理非常豐富, 飛彈牛排非常好食

我哋3個食吓傾吓就食咗兩個幾鐘, 食到得返我哋~ 不過感覺非常好, 好開心

之後仲去咗酒店入面浸足湯

人生就係要有D時出黎輕鬆下先得~ ^^

夜晚再浸溫泉, 今次浸酒店內的露天溫泉, 仲有免費腳按摩機添~~ 嘻嘻~

很豐富的一日~

聽日上新穗高山~~~ 希望好天LA~~

• Prev
• Next